METRO MANILA, Philippines — Naghain ng resolusyon si Senate Majority Leader Francis Tolentino nitong Huwebes para maimbestigahan sa Senado ang oil spill na idinulot ng paglubog ng MT Terranova sa dagat na sakop ng Limay, Bataan.
Sa inihain niyang Senate Resolution No. 1084, hiniling ni Tolentino na ang Commmittee on Environment, Natural Resources and Climate Change, na pinamumunuan ni Sen. Cynthia Villar, ang magsagawa ng imbestigasyon.
Ayon kay Tolentino kailangan alamin ang epekto ng insidente sa marine ecosystem, gayundin sa kalusugan, seguridad sa pagkain, at kabuhayan ng mga nasa apektadong lugar.
BASAHIN: Tanker lumubog sa Manila Bay sa Bataan, nagsanhi ng oil spill
BASAHIN: Mga isda mula sa Bataan iniluto, pumasa pa sa panlasa – BFAR
May pangangailangan din aniya na mabigyan ng sapat na tulong ang mga apektadong komunidad, lalo na ang mga mangingisda at ang mga umaasa sa sektor ng turismo.
Sinabi niya na marami sa mga residente sa mga apektadong lugar sa Cavite — tulad ng Bacoor City, Kawit, Noveleta, Rosario, Tanza, Naic, Maragondon at Ternate — ay nabubuhay sa pangingisda at turismo.
Noong Miyerkules nagdeklara ng state of calamity ang Cavite at ipinagbawal muna ang paghuli sa tahong, alimasag, alimango at halaan.
Sa ulat ng Philippine Coast Guard (PCG), may kargaang 1.4 milyong litro ng industrial fuel at MT Terranova nang lumubog ito noong ika-25 ng Hulyo.