METRO MANILA, Philippines — Dismayado si Sen. Sherwin Gatchalian sa mga ibinahaging ulat ng Bureau of Immigration (BI) ukol sa pagpapalayas sa bansa ng mga naarestong hinihinalang utak ng illegal Philippine offshore gaming operations (POGOs).
Sinabi ni Gatchalian na maghahain siya ng resolusyon para isumite ng kawanihan ang kumpleto at detalyadong ulat ng deportasyon ng mga POGO bosses, na karamihan ay Chinese nationals.
Ikinatuwiran niya na sa napakaraming insidente na nasangkot ang BI sa kontrobersya at iskandalo hindi maitatanggi na maaring may bahid ng korapsyon ang naging proseso ng deportasyon.
BASAHIN: 6 na South Koreans, 15 Pinoy huli sa hotel basement Pogo hub
Unang isiniwalat ni Sen. Risa Hontiveros na may impormasyon siya na hindi nakarating ng China ang POGO bosses nang palayasin sa Pilipinas at tumakas ang mga ito sa “stop-over” ng kanila sinakyang eroplano sa Hong Kong.
Nais din ni Gatchalian na ipaliwanag ng BI ang kakulangan pa rin ng konkretong detalye ukol sa pagtakas ni dating Bamban Mayor Alice Guo o Guo Hua Ping patungong Malaysia sa kalagitnaang ng mga kaliwa’t kanang pag-iimbestiga ng Senado at iba pang ahensiya ukol sa POGO.
