METRO MANILA, Philippines — Itinanggi ni Sen. Grace Poe na kabilang siya sa mga pinagpipilian para maging susunod na kalihim ng Department of Trade and Industry (DTI).
Sinabi ni Poe nitong Huwebes na walang kumausap sa kanya para pumalit sa iniwan na puwesto ni Trade Secretary Alfredo Pascual, na iiwan ang posisyon ngayong Biyernes.
Idiniin ni Poe na nakatutok siya ngayon sa mga responsibilidad bilang namumuno sa Senate Committee on Finance.
BASAHIN: Trade Secretary Alfredo Pascual nag-resign; pumayag si Marcos
Aniya, magiging abala siya dahil naipasa na ng Department of Budget and Management (DBM) ang 2025 National Expenditure Program (NEP).
Napakahalaga aniya na makapaglaan ng tamang pondo sa mga programa at proyekto na makakapagpagaan ng buhay ng mga Filipino.
Kailangan din matiyak ang tamang paggamit sa mga pondo.
Inamin naman niya na magiging malaking karangalan sa kanya kapag inalok siya na maging bahagi ng gabinete ni Pangulong Marcos Jr., ngunit mas nais niya na matutukan ang kanyang mga trabaho bilang mambabatas sa mataas na kapulungan ng Kongreso.