METRO MANILA, Philippines — Nagkaisa ang mga senador na suspindihin ang Senate rule ukol sa kanilang “virtual attendance” dahil sa kondisyon ni Sen. Ramon “Bong” Revilla Jr.
Kahapong Lunes, hiniling nina Sens. Imee Marcos at Francis Tolentino na payagan na lamang ang virtual attendance ni Revilla na sa pagdalo ng sesyon ay may gamit na saklay.
Umani ito ng debate dahil ang patakaran sa virtual attendance ng mga senador ay para lamang sa mga may 2019 coronavirus.
BASAHIN: Sen. Bong Revilla Jr., posibleng lumabas na ng ospital matapos operahan sa paa
BASAHIN: Sen. Bong Revilla sasailalim sa bone injury operation bukas
Nitong Martes, nagsumite na si Revilla ng kanyang sulat kay Senate President Juan Miguel Zubiri para sumailalim sa medical leave.
Binanggit niya na ang pinayuhan na siya ng kanyang doktor na magpahinga dahil bumuka ang sugat at namaga ang bahagi ng kanyang paa na inoperahan noong nakaraang buwan.
Sa pagbubukas ng sesyon, natalakay muli ang kondisyon ni Revilla. Walang senador na tumutol na suspindihin pansamantala ang partikular na tuntunin sa Senado ukol sa virtual attendance.
Kasunod nito, nagpasalamat na si Revilla sa mga kapwa senador, partikular na kay Zubiri, sa pagpayag sa kanyang hiling sa Senado.