Tuloy na tuloy na ang pagtatambalan ng North at South Korea para sa isang ice hockey team na ilalaban sa nakatakdang Winter Olympics.
Ito ay matapos ang pagdating na ng isang dosenang female hockey players sa National Training Center ng South Korea.
Binagtas ng mga atleta ang North-South Korean border at sinalubong ng mainit na pagtanggap habang nililibot ang athlete’s village ng kanilang South Korean teammates at ng Canadian Coach na si Sarah Murray.
Masayang masaya naman si North Korean coach Park Chol Ho dahil nagkaisang muli ang dalawang bansa sa pamamagitan ng partisipasyon sa Olympics.
Umaaasa anya siya na magkakaroon ng magandang resulta ang pagkakaisang ito.
Samantala, nag-group picture ang dalawang grupo ng mga atleta sigaw-sigaw ang “We are one”.
Hindi pa naman sila mageensayo ng magkasama sa loob ng ilang araw sapagkat kailangan pa ni Coach Murray na makilala ang North Koreans.
Magaganap ang Winter Olympic Games sa Pyeongchang, South Korea sa Pebrero.