Kinumpirma ng France ang paglulunsad nito ng kauna-unahang airstrike laban sa mga Islamic extremists sa Syria.
Ayon sa tanggapan ni French President Francois Hollande, isinagawa ang mga airstrikes upang malabanan at masupil ang banta ng terorismo na pinangungunahan ng Islamic State.
Ayon naman kay French Prime Minister Manuel Valls, inilunsad ang mga airstrike bilang ‘self defense’ at sinalakay lamang ang mga lugar na pinanggalingan ng mga teroristang unang sumalakay sa France.
Gayunman, hindi tinukoy ng pinuno ang eksaktong lugar ng mga pambobomba.
Ang operasyon ng France ay hiwalay pa sa serye ng mga airstrikes na isinasakatuparan ng coalition na pinangungunahan ng Amerika.
Matatandaang noong Enero, sinalakay ng mga pinasok ng mga Islamist terrorist ang tanggapan ng Charlie Hebdo, isang satirical magazine at pinaulanan ng bala ang mga manggagawa dito.
Kasabay nito, isang kosher market din ang sinalakay ng mga gunman.
Sa dalawang naturang pagsalakay, nasa 20 ang namatay at nasa 22 naman ang nasugatan.