Matutunghayan sa pambihirang pagkakataon ang magkasabay na pag-iral ng tinatawag na ‘supermoon’ at total lunar eclipse sa ilang bahagi ng mundo mula sa Lunes ng hapon hanggang Martes ng umaga.
Ang supermoon ay nagaganap kapag nasa pinakamalapit na punto ang buwan sa mundo.
Samantala, ang total lunar eclipse naman ay nagaganap sa oras na matakpan ng anino ng mundo ang sinag ng araw na tumatama sa buwan.
Ayon sa NASA, tatagal ang full eclipse ng buwan ng mahigit isang oras, depende sa panahon at lugar sa North at South America, Europe, Africa, at Western Asia.
Ang eclipse ay ang hudyat ng pagtatapos ng isang ‘tetrad’ o serye ng apat na total lunar eclipse na nagaganap sa pagitan ng tig-aanim na buwan.
Ang ‘tetrad’ ay nagsimula noong 2014.
Ang susunod na total lunar eclipse ay magaganap sa 2018 na.
Dito sa Pilipinas, bagama’t hindi masasaksihan ang total lunar eclipse, makikita naman ang matingkad na liwanag ng ‘supermooon’.
Sa panayam ng Radyo Inquirer kay Ed Lagok, observer ng PAGASA Astronomical Observation Division, sa March 2016, dito naman sa Pilipinas masasaksihan ang isang ‘partial solar eclipse.’