Ayon kay Transport undersecretary for roads at Metropolitan Manila Development Authority (MMDA) general manager Tim Orbos, hinihintay na lang nila ang pinal na rekomendasyonng kanilang technical working group tungkol dito.
Maliban kasi sa pagtitiyak ng kaligtasan at seguridad, makakatulong aniya ang regulasyon sa car window tints sa MMDA sa pagpapatupad nito ng “high occupancy vehicle” o HOV lane sa EDSA.
Matatandaang pinalawig pa ng MMDA ang pagpapatupad nila ng HOV lane sa EDSA hanggang sa unang linggo ng Enero upang mas makakuha ng datos tungkol sa naturang traffic scheme.
Ito’y upang mas mahikayat din ang publiko na mag-carpooling.
Sa isinagawang weeklong test ng MMDA, namonitor nila na 27,524 na sasakyan ang gumamit ng HOV lane.
Gayunman, 14,645 sa mga ito ang pawang heavily tinted ang mga bintana kaya hindi nila matukoy kung sumusunod ba sa polisiya ang mga driver.
Base kasi sa polisiya, tanging ang mga sasakyang may dalawang sakay lamang ang maaring gumamit ng HOV lane na nasa innermost lane ng EDSA.
Ayon kay Orbos, oras na ilabas na nila ito ay inaasahan nilang susundin ito ng mga motorista.