Pulisya, nilinaw na hindi sunog ang nangyari sa Robinsons-Davao

 

Nilinaw ng Davao City Police Office (DCPO) na ang unang naiulat na sunog sa Robinsons Cybergate sa kanilang lungsod, ay hindi pala talaga isang insidente ng sunog.

Ayon kay Senior Insp. Ma. Teresita Gaspan na tagpagsalita ng DCPO, lumalabas sa imbestigasyon ng pamunuan ng mall na ang nakitang usok ng guard dakong 2:55 ng madaling araw na nagmumula sa machine room sa unang palapag ng Robinsons ay tumatagas na Freon gas.

Ang nasabi aniyang usok mula sa nasabing bahaging supermarket ay hindi dulot ng anumang sunog o apoy.

Ikinabahala ng marami ang pagkakaulat sa umano’y sunog sa nasabing mall matapos ang malagim na trahedyang nangyari sa nasunog na NCCC mall sa Davao City din, na ikinasawi ng 38 katao.