Dapat imbestigahan ng senate blue ribbon at health committees ang ginawang pagbili ng Department of Health (DOH) ng bakuna sa dengue na Dengvaxia.
Pahayag ito ni Senator JV Ejercito kasunod ng anunsyo ng manufacturer ng vaccine na pwede itong magresulta sa matinding sakit kapag naibigay sa mga hindi pa nagkasakit ng dengue bago ang bakuna.
Ayon kay Ejercito, dapat na blue ribbon committee ang pangunahing komite na mag-imbestiga at secondary ang committee on health dahil ito ay ukol sa aniya’y kurapsyon at accountability.
Reaksyon ito ng senador sa pahayag ng health reform advocate na si Dr. Tony Leachon na dapat maalerto ang gobyerno dahil sa ginastos na P3.5 billion para sa bakuna.
Bago nito ay sinabi ng pharmaceutical company na Sanofi na ligtas at epektibo lang ang dengue vaccine na Dengvaxia para sa mga taong tinamaan ng sakit bago nabakunahan.
Sinabi ng kumpanya na batay sa anim na taong clinical data, sinuri ang pangmatagalang kaligtasan at pagiging epektibo ng bakuna sa mga nagka-dengue na.
Pero para sa mga hinid pa nagkasakit ng dengue, lumabas sa pagsusuri na sa pangmatagalan ay mas maraming kaso ng malalang karamdaman ang mangyayari matapos mabakunahan ng Dengvaxia.