Inaprubahan na ng bansang Bangladesh ang $280 milyong proyekto kung saan gagawing temporary shelter para sa 100,000 na Rohingya Muslims mula Myanmar ang isang isla na matatagpuan sa Bay of Bengal.
Ayon kay Planning Minister Mustafa Kamal, matatagalan pa bago mapabalik ang mga refugee kaya naman naisipan nilang bigyan ng panandaliang matutuluyan ang mga Rohingya Muslims.
2015 pa nang unang imungkahi na isaayos ang Bhashan Char island, o mas kilala sa tawag na Thenger Char, ngunit dahil sa mga kritisismo tungkol dito ay hindi natuloy ang mga unang plano.
Pangunahing kritisismo dito ang pagiging isolated at floo-prone nito simula Hunyo hanggang Setyembre na siyang panahon ng bagyo.
Bagaman maraming kritisismo sa isla, naniniwala ang Bangladesh na tama lamang itong gamiting temporary shelter para sa dumaraming bilang ng mga refugees.
Inaasahang matatapos ang pagsasaayos ng naturang isla, sa 2019.