Inihain ni Binay ang kanyang reklamo sa Makati City Prosecutor’s Office.
Ayon sa abogado ni Binay na si Claro Certeza, itinanggi mismo ng mga developers ang alegasyon na aniya ay patunay na sinungaling si Mercado at wala itong kredibilidad.
Sa pagdinig ng senate blue ribbon subcommittee, sinabi ni Mercado na tumanggap si Binay ng 60 hanggang 70 percent ng condominium buildings sa Makati City noong ito ang mayor sa loob ng dalawang dekada.
Sinabi ni Mercado na si Binay ay mayroong 150-square meter unit sa The Peak Condominium na nakapangalan kay Engineer Ariel Olivar na surveyor ng tinaguriang Hacienda Binay sa Rosario, Batangas.
Nakasaad sa bagong libel case ni Binay na inamin mismo ni Olivar na ang dating Vice Mayor ang nagtanong kung pwedeng gamitin ang kanyang pangalan na registered owner ng condo unit.
Dagdag ng kampo ni Binay, ang unit na nakapangalan kay Olivar ay ang parehong unit kung saan natagpuang patay ang dating live-in partner ni Mercado na si Racquel Ambrosio noong 2002.
Iginiit ni Binay na isa si Mercado sa sumisira sa kanyang reputasyon para umatras siya sa 2016 presidential election. “The damaging and ruinous claims spewed out by respondent mercado are mere concoctions and fabrications with no other purpose than to malign, discredit, ruing my reputation and besmirch my good name as well as that of my family,” ani Binay.
May una ng libel case si Binay laban kay Mercado kaugnay naman ng Boy Scouts-Alphaland deal.