Hinimok ni Pangulong Rodrigo Duterte ang South Korea na magnegosyo sa Pilipinas.
Sa bilateral meeting kagabi nina Pangulong Duterte at South Korean President Moon Jae-in, sinabi nito na magandang lugar ang Pilipinas sa negosyo sa larangan ng manufacturing, automotive, food production, processing, agribusiness, electronics at energy.
Sa naturang pagpupulong, nangako ang dalawang lider na paiigtingin pa ang relasyon ng Pilipinas at South Korea maging sa mga bansang kasapi ng Association of Southeast Asian Nations.
Sinamantala na rin ng pangulo ang naturang pagpupulong para pasalamatan ang South Korea dahil sa pagtanggap ng mga produkto ng Pilipinas.
Base sa talaan ng South Korea, umaabot sa 1.5 milyong Koreano ang bumibisita sa Pilipinas.
Samantala, inimbatahan naman ni Moon ang mga Filipino na manood sa Pyeongchang Winter Olympic games sa Pebrero sa susunod na taon.