Iginiit ni Lingayen – Dagupan Archbishop Socrates Villegas na walang magiging political color ang magaganap na pagtitipon sa EDSA Shrine ngayong araw.
Nakatakdang magdaos ng misa, prusisyon at cultural presentations ang CBCP ngayong araw para sa kampanyang “Start the Healing” na ikalawang bugso ng pagdarasal para sa mga biktima ng summary killings sa bansa.
Ayon sa video message ng arsobispo, ang kulay ng pagtitipon ay “transparency”, kalinawan ng paningin at kalinisan ng puso.
Ipinagdadalamhati anya ni Villegas ang pagkatuwa ng ilang mga Katolikong Pilipino sa tuwing makaririnig ng balita ukol sa pagpatay.
Anya, dapat sumandal ang lahat sa Diyos, hindi sa ideolohiya; sa Diyos at hindi sa kahit anong partido.
Samantala, ito rin ang siniguro ni dating Civil Service Commission Chairman Karina Constantino David.
Ani David, hindi papayagan ang kahit anong political speech upang mapanatili ang kabanalan ng misa at prusisyon.
Ang programa ngayong araw ay magwawakas sa prusisyon ng imahe ng Our Lady of Fatima na nauna nang dinala sa EDSA People Power Revolution noong 1986.
Pinaghahanda ng Obispo ang bawat mananampalataya sa loob ng 33 araw at hinihimok na manalangin at tumanggap ng banal na Komunyon.