Labanan sa Marawi City, nasa isang gusali na lang-AFP

 

Isang building na lang ang kailangang pasukin ng mga sundalo at tuluyang magagapi na ang puwersa ng Maute group sa Marawi City.

Ito ang kinumpirma ni Col. Romeo Brawner, deputy commander ng Joint Task Group Ranao sa pagharap nito sa mga mamamahayag sa Marawi City, Linggo ng hapon.

Paliwanag ni Brawner, kanilang sisikapin na tapusin na ang puwersa ng Maute na nagkukubli pa rin sa isang dalawang-palapag na commercial building sa main battle area hanggang mamayang hatinggabi.

Kahit aniya madilim na ay hindi nila ititigil ang opensiba laban sa Maute group giit ni Brawner.

Sa kanilang pagtaya, nasa 30 pang ‘stragglers’ ang nagtatago sa naturang gusali.

Kabilang dito ang nasa limang mga dayuhang nakipaglaban kasama ng teroristang grupo.