Kinalampag at ginising ang mga detainee ng Quezon City Police Station 10, kasama na ang aktor na si Baron Geisler para magsagawa ng inspeksyon ang mga otoridad.
Ito ay matapos makatanggap ng impormasyon mula sa isang concerned citizen na mayroong nakapasok na illegal substance sa loob ng detention facility na nasa pag-iingat naman umano ni Baron.
Alas 12:00 ng madaling araw nang mapansin ng concerned citizen na mayroong hawak na kahina-hinalang pakete na may lamang puting mala-pulbong substansya.
Bago mag-alas 4:00 ng umaga nang isagawa ang inspeksyon.
LOOK: Baron Geisler, kinapkapan sa loob ng kulungan | @dzIQ990 pic.twitter.com/ASxN4q6Wl2
— Justinne Punsalang (@Justinne24) October 18, 2017
Ayon kay PO2 Bryan Gusto ng QCPD Station 10, ginampanan lamang nila ang kanilang tungkulin.
Wala namang nakuha mula kay Baron na tila nagulat sa ginawa ng mga otoridad.
Matatandaang nakapiit si Baron sa Station 10 dahil sa panggugulo nito sa isang resto bar noong Lunes ng gabi.