Bigla na lamang nag-collapse ang goalkeeper na si Choirul Huda, 38-anyos sa field ilang segundo makaraan mabangga ng kanyang kasamang midfielder na si Ramon Rodriguez.
Batay sa video footage ng laro, sasaluhin sana ni Huda ang bola bago ito pumasok sa goal nang aksidente itong masalubong ang kanyang team mate na si Rodriguez.
Kapwa bumagsak ang dalawa matapos ang kanilang salpukan.
Sinikap pang tumayo ni Huda ngunit bigla nitong hinawakan ang kanyang dibdib hanggang sa tuluyang bumagsak.
Agad na isinugod sa ospital ang goalkeeper ngunit hindi na ito nagawa pang i-revive ng mga doktor.
Hinihinalang dahil sa tindi ng impact ng salpukan ng dalawa, biglang huminto sa pagtibok ang puso ng manlalaro na siyang ikinamatay nito.
Libu-libong mga fans ni Huda ang naghatid ng pakikiramay sa biglaang pagpanaw ng atleta.