Nais nang sumuko ng ilang mga miyembro ng Maute group, ngunit nangangamba lang sila para sa kanilang buhay.
Ayon kay Defense Sec. Delfin Lorenzana, ipinarating sa kaniya ni Lanao del Sur Rep. Mauyag Papandayan na nais nang sumuko ng mga miyembro ngunit nakiusap ang mga ito na huwag silang patayin.
Dahil dito, tiniyak ni Lorenzana sa mga miyembro ng Maute na hindi naman sila papatayin ng mga sundalo kung susuko na sila dahil hindi naman mamamatay-tao ang mga ito.
Kung sino man aniya ang mga susuko ay kanilang tatanggapin.
Samantala, nabanggit rin ni Lorenzana na nakatanggap siya ng mensahe mula sa mga militar sa Marawi City na nabawi na nila ang White Mosque.
Aniya pa dahil dito, kaunti na lang ang kailangan nilang mabawi at inaasahang baka sa Linggo ay matapos na ang krisis sa Marawi.