Maghahain ang Office of the Ombudsman ng motion for consideration kaugnay sa motion for bail ni dating Senador Jinggoy Estrada na pinagbigyan ng Sandiganbayan special 5th division.
Sa isang press conference, sinabi ni Special Prosecutor Edilberto Sandoval na alinsunod sa kautusan ni Ombudsman Conchita Carpio-Morales ay maghahanin sila ng mosyong kumukontra sa pansamantalang kalayaan ni Estrada.
Ayon kay Sandoval, malaki ang posibilidad na mabalik sa kulungan si Estrada.
Maaari rin aniyang marecall ang desisyon ng Sandiganbayan, lalo’t may mabigat na ebidensya laban kay Estrada.
Katwiran pa ni Sandoval, hindi “applicable” sa kaso ni Estrada ang ruling ng Korte Suprema sa kaso ni dating Pangulong Gloria Arroyo.
Ibig sabihin, ani Sandoval, ay may malaking kwestyon sa pasya ng 5th division ng Sandiganbayan, lalo’t isang non-bailable case ang plunder na kinakaharap ni Estrada.
Malaking- malaki rin aniya ang pagkakaiba ng GMA case sa Estrada case.
Inhalimbawa ni Sandoval na ang GMA case ay inaakusahan ang mga public officers, habang sa Estrada case ay nakipagsabwatan ang mga opisyal ng pamahalaan sa pribadong tao.
Sa GMA case din, public treasury ang pinagnakawan umano samantalang sa Estrada case ay may misuse at malversation,ng pondo.
Sa kabila rin ng lahat ng nangyari, sinabi ni Sandoval na mayroon pa rin siyang trust and confidence sa Sandiganbayan.