Lima katao ang nalunod habang siyam ang sugatan sa Pangasahan river sa bayan ng San Jose, Tarlac dahil sa malakas na pagbuhos ng ulan Linggo ng hapon.
Ayon kay Sr. Supt. Alex Sintin, Tarlac Provincial Police Director, sa kanilang isinagawang paghahanap na nagsimula ng Linggo ng gabi ay na recover nila ang mga katawan nina Mark Raven Villaneva, Rocky Sumalinog, Jose Bernadette Ramirez, Jo Marie San Diego at Dooren Adriano.
Dagdag pa ni Sintin, ang mga biktima ay kasama sa 54 na mountaineers na nagsagawa ng ‘outreach program’ sa Sitio Baag, isang Aeta village sa Barangay San Pedro kung saan sila ay namigay ng mga school supplies para sa mga bata.
Ayon naman kay San Jose Vice Mayor Romeo Capitulo, patungo sa kabilang bayan sa San Jose ang grupo na dalawang oras ang layo mula sa barangay San Pedro nang maganap ang malagim na insidente.