Patuloy na humihiling ng tulong para sa relief operation ang lokal na pamahalaan ng Ormoc matapos ang naganap na malakas na lindol noong Huwebes.
Ayon kay Ormoc Mayor Richard Gomez, nakararanas pa rin sila ngayon ng water crisis dahil nasira ang linya ng kanilang water system bunsod ng malakas na pagyanig.
Dahil dito, malaking tulong aniya sa mga apektadong residente ang mga donasyong bottled water.
Labingtatlong barangay sa Ormoc City ang labis na naapektuhan ng lindol at sa pinakahuling datos ng lokal na pamahalaan, mahigit isang libong bahay ang nasira o partially damaged, habang 833 naman ang totally damaged.
Sinabi ni Gomez na sa mga nais tumulong, itinalaga niya ang civic groups kabilang ang Rotary Club of Ormoc Bay at the Lions’ Club para mangasiwa sa pagtanggap ng in-kind donations.
Habang ang Ormoc City Chamber of Commerce naman ang tatanggap ng cash donations.
Maaring ideposito ang cash donation sa Security Bank account, CA-0000-006654-493.
Nagpasalamat din si Gomez sa pribadong kumpanya at sa Department of Social Welfare and Development (DSWD) sa patuloy na pagbibigay ng donasyon.