2 Cebu Pacific flight na patungong Maynila, na-divert sa Clark Airport dahil sa sama ng panahon

Dahil sa sama ng panahon, dalawang Cebu Pacific flight ang na-divert sa Clark International Airport ngayong araw ng Linggo.

Sa abiso ng Manila International Airport Authority, lumapag sa Clark Aiport sa Pampanga ang flight 5J 326 mula Legazpi City na patungo sana ng Manila bandang 1:30 ng hapon.

Bandang 2:15 naman ng hapon nang dumating sa Clark Airport ang flight 5J 660 mula Tacloban na patungon rin ng Manila.

Una nang nag-abiso ang PAGASA na makararanas ng mga pag-ulan ang Metro Manila at ilang bahagi ng Rizal, Laguna, at Batangas ngayong araw.

Sinabi ng weather bureau na tatagal ng hanggang dalawang oras ang mga pag-ulan.