Pasado alas onse kagabi nang masamsam ng NBI ang droga na nakalagay sa dalawampu’t isang pakete at tinatayang may street value na isang daang milyong piso.
Nabatid na maghapon binantayan ng mga otoridad ang puting kotse na nakaparada sa Brgy. Habay Dos, Bacoor City.
Isinagawa ng NBI ang pagkilos matapos may makarating sa kanilang impormasyon na may laman itong droga at kukunin ng isang buyer subalit walang dumating.
Nang halughugin ng mga otoridad ang sasakyan ay doon nadiskubre ang dalawang sports bag sa likurang bahagi ng kotse kung saan nakasilid ang droga.
Palaisipan din sa mga otoridad ang iniwang susi ng sasakyan sa gilid ng gulong nito na yun din pala ang susi ng naturang kotse.
Inaalam pa ng NBI kung sino ang nag-iwan ng naturang kotse.
Kung matatandaan, nito lamang nakaraang Sabado ay may narekober naman ang Philippine National Police na mahigit tatlong kilong shabu sa isang sasakyan sa parking lot ng isang mall sa Taguig City.