Umabot sa mahigit 1,000 ang naranasang aftershocks sa Batangas mula noong unang tumama ang lindol sa lalawigan noong Martes.
Ayon kay Phivolcs Director Renato Solidum, kabilang na dito ang apat na naranasang pagyanig noong Sabado, na aniya ay may katamtamang lakas lamang.
Sunud-sunod na naranasan ang mga pagyanig, lalo na noong Sabado, kung saan hindi lang sa Timog Luzon naramdaman ang lindol kundi umabot pa sa Gitnang Luzon.
Sa kabila nito, sinabi ni Solidum na walang dapat ikabahala dahil pangkaraniwang nagtatagal ng ilang araw o linggo ang unti-unting paggalaw ng fault line.
Nanawagan naman ang Phivolcs sa publiko na iwasan ang pagkakalat sa social media, o sa text messages ng mga maling impormasyon tungkol sa lindol.
Kumalat kasi sa internet ang maling impormasyon tungkol sa umano’y nakaambang Intensity 8 na lindol na tatama sa Luzon, kasunod ng pagyanig sa Batangas noong Sabado.
Paalala ng Phivolcs na walang teknolohiya ang kayang hulaan ang eksaktong oras, petsa at lugar ng malakas na lindol.