Namataan ng Philippine Navy ang isang ‘unidentified aircraft’ sa kanilang pagpapatrulya sa Benham Rise.
Bukod dito, may nakita rin na isang barko na walang bandila ng Pilipinas at hindi sumasagot sa radio message.
Pero kalaunan ay nabatid na ang barko ay pagmamay-ari ng mga mangingisda mula sa Zambales.
Ayon sa Philippine Navy, regular na silang magpapatrulya sa Benham Rise at kung kinakailangan ay iinispeksyunin nila ang mga barko na kanilang mamamataan.
Noong March 17, idineploy ang BRP Alcaraz sa Benham Rise para magpatrulya matapos mapaulat ang presensya ng isang Chinese vessel noong nakaraang taon.
Una nang nagbigay ng direktiba si Pangulong Rodrigo Duterte sa militar na sabihan sa maayos na paraan ang mga Chinese vessel na maglalayag sa Benham Rise na pagmamay-ari ito ng Pilipinas.
Sinabi naman ni Foreign Affairs Secretary Enrique Manalo na nirerespeto ng China ang sovereign rights ng Pilipinas sa Benham Rise.