CBCP, ikinagalak ang pakikiisa ng Austrian bishops sa pagkondena sa mga human rights violations

Nagpahayag ng kagalakan ang Catholic Bishops Conference of the Philippines (CBCP) sa Austrian Bishops Conference (ABC) sa pakikiisa nito sa pagtuligsa sa mga pang-aabuso sa karapatang pantao sa bansa sa ilalim ng administrasyong Duterte.

Sa liham na ipinadala ni Lingayen-Dagupan Archbishop Socrates Villegas, presidente ng CBCP, aminado ito nahihirapan ang simbahan na ibahagi ang mga aral ng Diyos sa gitna ng ‘culture of death’ na unti-unting kumakalat sa bansa.

Sa kabila nito, nanindigan ang Simbahang Katolika na hindi sila mananahimik at hindi nila hahayaan na magpatuloy nito.

Kasabay nito, hiniling ng CBCP sa ABC na ipagdasal ito sa gitna ng pamamayagpag ng ‘terror’ o takot sa Pilipinas.

Matatandaang inanunsyo ng Austrian bishops ang pagkondena nito paglabag sa karapatang pantao at panunumbalik ng parusang kamatayan sa bansa.

Ang ABC ang kauna-unahang banyagang Catholic bishops na tumuligsa sa mga kaganapan sa bansa sa ilalim ng Administrasyong Duterte.