Pabuya, ibibigay sa makapagtuturo sa suspek sa pagpatay sa volunteer doctor

Inaprubahan na ng lokal na pamahalaan ng Lanao del Norte ang pagbibigay ng pabuya sa sinumang makapagtuturo sa pumatay sa volunteer doctor na si Dreyfuss Perlas kamakailan.

Si Perlas ay binaril habang minamaneho niya ang kaniyang motorsiklo pauwi sa bayan ng Kapatagan noong Miyerkules ng gabi.

Ayon kay Lanao del Norte police chief Senior Supt. Faro Antonio Olaguera, nagsagawa na sila ng conference kung saan pinag-usapan nila ang mga posibleng makaresolba sa kaso ng pagpatay kay Perlas.

Sisiyasatin rin aniya ng Anticybercrime Group ang cell phone ni Perlas na password-protected, sa pag-asang makakuha ng mga leads tungkol sa pagpatay sa kaniya.

Pagtutuunan rin aniya nila ng pansin ang ulat na may natatanggap umanong banta sa buhay si Perlas.

Nakainitan din umano ni Perlas ang isang pasyente o kaanak ng isang pasyente sa Bontilao Country Hospital kung saan siya nanilbihan.

Samantala, naibalik naman na sa Kalibo, Aklan mula sa Pagadian City ang mga labi ni Perlas sa pamamagitan ng C-130 plane.

Malaki ang pasasalamat ng pamilya Perlas sa lokal na pamahalaan ng Lanao del Norte sa pagtulong sa kanila, at umaasa din sila na mabibigyang hustisya ang pagkamatay ng tinaguriang “Superman Doctor.”