Sinuspinde muna ng mga international traders ang pangangalakal sa Autonomous Region in Muslim Mindanao (ARMM) gamit ang Polloc Port sa lalawigan ng Maguindanao.
Ang Polloc Port kasi ang nagsisilbing pangunahing daanan ng international trade sa rehiyon.
Ito ay dahil sa sunud-sunod na mga pag-atake ng mga pirata sa Sulu na dinadaanan ng mga kargamento.
Ayon kay Ishak Mastura, chairman ng ARMM Regional Board of Investments, nababahala na sila sa pagiging laganap ng pamimirata sa Sulu sea, na lubha nang nakaapekto sa kanilang international trade na nagreresulta ng kawalan ng kita ng rehiyon.
Naitala ang pinakahuling pag-atake noon lamang February 19, kung saan pinatay ng mga pirata ang isang tripulanteng Vietnamese, at dinukot ang pitong iba pa nitong kasamahan.
May kargang 4,500 toneladang semento mula Indonesia ang carrier na Giang Hai ng Vietnam.
Ayon sa report ni Polloc Port manager Hexan Mabang, ito ang naghudyat sa pagsuspinde ng ilang mga shipments ng semento at iba pang kargamento, dahil ayaw na ng mga charter vessels na dumaan sa Sulu Sea patungo sa Polloc at iba pang pantalan sa Mindanao.
Hindi naman agad na natukoy kung gaano karaming kargamento ang pansamantalang sinuspinde.