Robredo naghihintay ng imbitasyon mula sa Malacañang para sa EDSA celebration

Interesado si Vice President Leni Robredo na dumalo sa mga aktibidad para sa ika-tatlumpu’t isang anibersaryo ng EDSA People Power Revolution.

Sa ambush interview sa Kamara, sinabi ni Robredo na nais niyang makibahagi sa selebrasyon.

Inatasan na umano niya ang kanyang staff na alamin kung anu-ano ang mga aktibidad para sa EDSA People Power Revolution at kahit sa isang misa ay gusto niyang dumalo.

Gayunman, inihayag ni Robredo na wala pa siyang natatanggap na imbitasyon mula sa Malacañang.

Matatandaang ilang beses na hindi naiimbitahan si Robredo sa mga okasyon ng na inorganisa ng Palasyo.

Si Robredo ay nasa Kamara kanina para dumalo sa pagdinig ng House Committee on People’s Participation.