Mariing kinondena ng National Union of Journalists of the Philippines (NUJP) ang mga tauhan ng Presidential Security Group (PSG) na nagtangkang pigilan ang media na i-cover ang kilos protesta sa Malacañang ng mga political prisoners kaninang umaga.
Sa isang statement, sinabi ng NUJP na bagama’t nauunawaan nila ang trabaho ng PSG na bantayan ang palace grounds, ang hindi nila maintindihan ay kung bakit kailangan pa nitong kumpiskahin ang camera footage na kinuha ng mga mamamahayag.
Base sa mga ulat, nakipag-agawan ang isang reporter para sa kanyang cellphone sa isang PSG guard na tinangka umanong burahin ang kanyang kinuhang video clips ng kilos protesta.
Mabuti at nakatakas ang mamamahayag sakay ng kanyang crew cab.
Ayon sa NUJP, malinaw aniya na hindi naiintindihan ng PSG ang trabaho ng media at ang nakakatakot aniya ay mukhang hindi rin nito alam kung ano ang sakop ng kanilang otoridad.
Kaugnay nito, nanawagan ang NUJP sa
Presidential Task Force on Media Safety na agad na imbestigahan ang nasabing insidente at tiyakin na madidisiplina ang mga sangkot na PSG at hindi na ito mauulit sa hinaharap.