Dalawang katao ang magkasunod na pinagbabaril ng dalawang riding in tandem sa magkahiwalay na lugar sa Manggahan, Pasig City bago mag hatinggabi ng Martes.
Unang napatay si Joven Bunaga, 27 years old, na nakatakbo pa sa loob ng bahay pero sinundan pa rin ito ng mga armadong kalalakihan at saka pinagbabaril sa ikalawang palapag ng bahay sa Katimugan St., Karangalan Village, Brgy. Manggahan, Pasig City.
Pagkatapos magawa ang krimen, agad na tumakas ang mga suspek sakay ng dalawang motorsiklo.
Aminado naman ang pamilya ng biktima na dating gumagamit ng bawal na gamot si Joven pero matagal na umano itong nagbago.
Ilang minuto lang ang lumipas, patay din si Peter Cruz, 24 years old, matapos na pagbabarilin sa may Guyabano St., Napico, Brgy. Manggahan, Pasig City.
Ayon sa ina ng biktima, habang nagbibisikleta ang kanyang anak sa Guyabano Street, nilapitan siya ng dalawang riding in tandem saka binaril hanggang sa mapatay.
Pero ayon naman kay Boy Buenaventura, Barangay Security Force ng Brgy. Manggahan, minsan na umanong nakulong si Peter Cruz dahil sa akyat bahay.