Tulong para sa pamilya ng binitay na OFW sa Kuwait, tiniyak ng DOLE

Pinamamadali ni Labor Secretary Silvestre Bello ang pagkakaloob ng tulong sa pamilya ni Jakatia Pawa, ang overseas Filipino worker na nabitay sa Kuwait.

Sa isang pahayag, partikular na inaatasan ni Bello ang Overseas Workers Welfare Administration o OWWA na inatasan din para isailalim sa psycho-social counselling ang Pamilya Pawa.

Kasabay nito, nagpahayag din ng pakikidalamhati si Bello sa pamilya Pawa lalu pa’t batid niyang doble ang sakit para sa kanila ng biglaang pagpapatupad ng hatol na bitay.

Tatanggap ang naulilang pamilya ni Pawa ng P120,000 tulong-pinansiyal, kasama ang P20,000 tulong sa pagpapalibing.

Makakatanggap din ng college scholarship ang dalawang anak ni Jakatia.

Kaugnay nito, pupunta sa Zamboanga del Norte si OWWA Administrator Hans Leo J. Cacdac upang bisitahin at makiramay sa pamilya ni Pawa at alamin kung ano pang karagdagang tulong ang maaaring maibigay.