Pumayag na ang US Supreme Court na isalang sa bitay ang isang preso na may limang taon nang humihiling na bilisan ang pag-execute sa kanya.
Ngayong araw nakatakdang isalang sa death chamber ang 27-anyos na inmate na si Daniel Lee Lopez na nahatulan ng bitay matapos mapatay ang isang Police Lieutenant sa car chase sa Corpus Christie, Texas may anim na taon na ang nakalilipas.
Ibinasura ng US Supreme Court ang naunang apela ng mga abugado ni Lopez na nagsabing gusto lamang ng kanilang kliyente na magsuicide gamit ang legal system ng Amerika.
Giit ng Korte, nasa sapat na katinuan ang inmate na si Lee nang hilingin nito na bilisan ang proseso ng bitay sa pamamagitan ng lethal injection.
Ayon kay Lopez, tanggap na niya ang kanyang kapalaran at handa na siyang harapin ito.
Una rito, ilang ulit na ring sumulat si Lopez sa Federal Court judge at iginigiit na bilisan na ang pagsalang sa kanya sa hatol na bitay at huwag nang bigyan pa ng reprieve sa kaso.
Si Lopez ang suspek sa pagsagasa at pagpatay kay Corpus Christie Police Lieutenant Stuart Alexander nang tangkain nitong pigilan ang suspek na tumakas noong 2009./ Jay Dones