Nakahandang tumalima si PNP Chief Ronald Dela Rosa sa payo ni Senador Panfilo Lacson na mas mag-focus sa kanyang trabaho at bawasan ang mga public engagements.
Ito ang sinabi ni Dela Rosa matapos na umani ng pagpuna sa social media ang kanyang pagdalo sa isang concert at panonood ng isang pelikula habang mainit ang usapin tungkol sa pinatay na Koreano.
Paliwanag ni Bato, nakikita niya ang punto ni Sen. Lacson, at dahil iniidolo niya ang dati niyang hepe sa PNP, ay pakikinggan niya ang payo ng senador.
Una nang iginiit ni Bato na hindi naman na maibabalik ang buhay ng Koreano na umanoy pinatay ng mga tiwaling pulis, kung maglupasay at magkulong lang siya sa kanyang tanggapan.
Noong Huwebes, humingi pa ng paumanhin si Bato sa bansang Korea sa sinapit ng kanilang kababayan, at sinabing natutunaw siya sa kahihiyan.
Samantala, tiniyak naman ni Bato na gagawin niya ang lahat para masolusyonan ang krimen at mapanagot ang mga may sala.
Sa ngayon, nasa kustodiya na ng PNP ang pangunahing suspek na si SPO3 Ricky Sta. Isabel matapos naman itong masampahan ng kasong kidnapping with homicide sa Angeles, Pampanga RTC Branch 58.