Ibinunyag ni Justice Sec. Vitaliano Aguirre II na may ilang mga matataas na opisyal ng Philippine National Police (PNP) ang dawit umano sa pag-dukot sa dating executive ng Hanjin shipping firm na si Jee Ick Joo.
Ayon kay Aguirre, tinukoy na ni SPO3 Ricky Sta. Isabel ang mga opisyal ng pulis na kasangkot sa pagdukot kay Jee noong October 18, 2016.
Bukod pa aniya ito sa walong kakuntsaba umano ni Sta. Isabel na nahaharap na rin sa kaso sa Department of Justice (DOJ).
Ani Aguirre, matataas na mga tao na nakapaligid sa PNP ang ibinunyag ni Sta. Isabel na posibleng sangkot sa krimeng ito.
Gayunman, hindi pa naidodokumento ang mga inilahad ni Sta. Isabel sa NBI, dahil nagkaroon pa ito ng hindi pagkakaintindihan sa kaniyang abogado.
Samantala, hindi naman na nagbigay ng iba pang detalye si Aguirre tungkol sa mga nasabing sangkot na opisyal ng pulis.
Sa ngayon ay nasa ilalim na ng kustodiya ng NBI si Sta. Isabel mula nang sumuko ito.
Hindi naman isinasantabi ni Aguirre ang posibilidad na mapasailalim ng witness protection program si Sta. Isabel dahil marami itong nalalaman sa kaso.