Nakatakdang bisitahin ni Pangulong Rodrigo Duterte ang dalawang Russian warships na naka-daong sa Manila Bay ngayong araw.
Matatandaang dumating sa Maynila ang antisubmarine vessel ng Russia na Admiral Tributs, at ang sea tanker nila na Boris Butoma noong Martes, para sa isang apat na araw na goodwill visit.
Ayon kay Presidential Spokesperson Ernesto Abella, makakatulong ang nasabing goodwill visit ng Russian Navy sa kanilang pakikipagkaibigan sa Philippine Navy.
Isa rin aniya itong pahiwatig na maari pang mas pagandahin ang maritime cooperation sa pagitan ng Pilipinas at ng Russia, upang maisulong ang diplomasya at camaraderie.
Una nang sinabi naman ng pangulo na bukas siya sa pagkakaroon ng joint military exercises sa pagitan ng Pilipinas at Russia.
Ayon naman kay Rear Adm. Eduard Mikhailov, na deputy commander ng Flotilla ng Russian Navy Pacific Fleet, pag-uusapan pa nila ang posibilidad ng nasabing aktibidad.