Limpak-limpak na mga iligal na paputok ang nasabat ng mga otoridad sa rehiyon ng Caraga.
Dahil sa mas pinaigting na pagpapatupad ng Task Force “Ligtas Kapaskuhan 2016″ ng Philippine National Police (PNP), nasabat nila ang nasa 600,000 piraso ng mga ipinagbabawal na paputok sa naturang lugar.
Ayon kay Chief Supt. Rolando Felix, bahagi lamang ito ng mas marami pang mga iligal na paputok mula sa mga bayan ng Prosperidad at Bislig.
Kabilang sa mga nakumpiskang paputok ay ang Piccolo na sinasabing pangunahing sanhi ng mga firecracker-related injuries, Watusi, Baby Rocket, Super Lolo, 5-Star OG, Whistle bomb, Giant Kwitis, Pop pop, Atomic triangle na tinatawag na “Uzi,” Big Mega at Pla-pla.
Natukoy naman ng mga otoridad ang mga may-ari ng mga nasabing paputok, at inihahanda na ang mga kasong isasampa laban sa kanila bukas.
Samantala, wala namang naitalang indiscriminate firing at mga kaso ng ligaw na bala sa nasabing rehiyon.