Mas pinaigting pa ng Philippine National Police (PNP) ang kampanya laban sa ipinagbabawal na paputok at iligal na droga sa pagsalubong sa taong 2017
Idinaan ni PNP-Police Community Relations Group Chief C/Supt. Gilbert Cruz ang kampanya sa kanyang 2-minute music video na pinamagatang ‘Dobleng Sabog Sa Bagong Taon’ na ginagampanan ng mga puppets.
Ayon kay Cruz, gumawa sila ng video na ipapalabas sa social media at maging sa mga media networks na naglalayon na mas maipaintindi lalo na sa mga bata at murang edad ang pinsala na maaring idulot ng iligal na mga paputok.
Paliwanag ni Cruz, gumamit sila ng mga puppets upang mas maintindihan ng mga bata na siyang dumadampot ng mga paputok na hindi sumabog o kaya ay mga naglalaro ng mga watusi ang panganib ng paputok.
Dapat din umanong maipaliwanag sa publiko kung gaano ka delikado lalo na sa mga sabog sa droga ang mga iligal na paputok.
Bibida sa nabanggit na video ang mga puppet ni Pangulong Rodrigo DUterte at PNP Chief Ronald “Bato” Dela Rosa.
Tampok din dito ang mga puppets na sina Boy Sabog, Boy Watusi at Matikas na eere sa mga media at social networks kasabay ng paglulunsad nito bukas.