Arestado ang isang sinasabing miyembro ng sindikato ng human trafficking sa Ninoy Aquino International Airport matapos tangkain na magpaalis ng anim na babaeng biktima na napanggap bilang mga turista.
Ayon kay Immigration Spokesperson Atty. Antonette Mangrobang, napigilan ng kanilang mga tauhan ang tangkang operasyon ng human trafficking bago makasakay ang suspek at ang mga biktima sa eroplano ng Philippine Airlines na may flight patungong Hong Kong sa NAIA Terminal 2.
Sa isinagawang pagtatanong sa mga biktima, umamin ang mga ito na ang aktwal nilang destinasyon ay Dubai at sila ay magtatrabaho doon bilang mga kasambahay.
Aminado rin ang mga biktima na bitbit ng kasama nilang lalaking escort ang kanilang visa patungo ng United Arab Emirates.
Matapos ang pagtatanong, inilipat na ang mga biktima at suspek sa kustodiya ng Inter-Agency Council Against Trafficking (IACAT) para sa paghahain ng kaukulang reklamo.