1 sugatan sa landslide sa Binangonan, Rizal

 

Sugatan ang isang lalaki matapos biglang mag-bagsakan sa kaniyang tahanan ang malalaking bato at tipak ng lupa, sa Purok 4, Brgy. Sapang Bato sa Binangonan, Rizal.

Isang residente ang tumawag sa otoridad para humingi ng saklolo para sa biktimang nakilalang si Luisito Oliveros.

Base sa inisyal na imbestigasyon ng pulisya, nasa loob ng kaniyang tahanan si Oliveros nang mabagsakan ng mga bato mula sa bundok ang kaniyang bahay, dahil walang humpay na ulan kagabi sa lugar.

Humingi rin ng tulong ang pulisya sa Municipal Disaster Risk Reduction and Management Council (MDRRMC) upang mailigtas ang biktima at para na rin matukoy kung may iba pa bang nadamay.

Isinugod sa ospital si Oliveros upang mabigyang lunas matapos magtamo ng mga sugat.