Anim na pulis ng NCRPO, ipatatapon sa Mindanao dahil sa pagkakasangkot sa illegal drugs

Nakatakda nang ilabas ng Natonal Capital Region Police Office (NCRPO) ang reassignment papers patungong Mindanao ng mga pulis na sangkot sa katiwalian at iligal na droga.

Ayon kay NCRPO Director Chief Supt. Oscar Albayalde, isinasailalim din ngayon sa evaluation at monitoring ng NCRPO ang animnapu’t pitong mga pulis sa Metro Manila na sangkot sa katiwalian at ilegal na droga.

Paliwanag ni Albayalde, sa animnapu’t pito, anim sa mga ito ay hinihintay na lamang na mailabas ang kaukulang reassignment papers patungo sa rehiyon ng Mindanao.

Sa ngayon, mayroon ng mahigit 150 mga pulis ng NCRPO ang naipatapon na sa Mindanao na karamihan ay mga ninja cop o mga pulis na sangkot sa pagri-recycle ng iligal na droga.