Isang panukalang batas ang inihain ng mga lider ng Kamara na layong makaiwas na sa suspension ang mga Kongresista na nakakasuhan sa Sandiganbayan dahil sa mga anomalaya o iregularidad na nangyari noong sila’y nasa dati pa nilang posisyon sa gobyerno.
Sa House Bill 3605 na ini-akda nina House Speaker Pantaleon Alvarez, House Majority Leader Rodolfo Farinas, House Minority Leader Danilo Suarez at Kabayan Partylist Rep. Harry Roque, pina-aamyendahan nila ang Republic Act 3019 o Anti-Graft and Corrupt Practices Act.
Mahigit sa limampung Kongresista na ang pumirma bilang pagsuporta o co-author ng panukala.
Nakasaad sa naturang House Bill na bibigyan na ng exemption sa pagpapataw ng preventive suspension ng hukuman ang sinumang opisyal ng gobyerno na hindi na konektado sa dating pwesto sa pamahalaan kung saan nag-ugat ang kasong kinakaharap.
Punto ng mga may-akda, ang preventive suspension ay naglalayon lamang na hindi maimpluwensyahan ng akusado ang mga saksi o mapakialaman ang mga record o ebidensya.
Pero kung wala na sa dating posisyon o iba na ang pwestong pinaglilingkuran, wala na umanong rason para mangambang makakaimpluwensya ang akusado.
Sa ngayon, pinatawan ng preventive suspension ng Sandiganbayan sina Camarines Sur Cong. L-Ray Villafuerte at Pangagasinan Cong. Amado Espino dahil sa magkahiwalay na kaso na nangyari noong silang lokal na opisyal ng kani-kanilang nasasakupan.