Isa ang patay at tatlo ang sugatan sa sunog na naganap sa tatlong palapag na bahay sa Lot 21, Block 5 Joshua Street, Bliss, Santa Lucia, Pasig City.
Kinilala ni Senior Fire Inspector Anthony Arroyo ng Pasig Fire Department ang nasawi na si Anselmo Tamayo, 50-anyos.
Habang sugatan naman ang asawa ng biktima na si Cynthia Tamayo, 52-anyos, at anak nilang si Janine-18 anyos.
Kapwa nakalanghap umano ng usok ang mag-ina at nahirapang huminga kaya dinala sa Mission Hospital.
Nasugatan din ang fire volunteer mula sa Maybunga Pasig na si Ian Saber, 28-anyos matapos mahulog sa ikalawang palapag ng nasusunog na bahay.
Umabot ng ikatlong alarma ang sunog sa bahay ni Adoracion Journales na nagsimula alas 4:20 ng umaga at naideklarang fire out alas 5:51 ng umaga.
Tinatayang P4.5 milyon ang halaga ng pinsala ng nasabing sunog.