Residential area sa Valenzuela, nasunog

Natupok ng apoy ang hindi bababa sa 30 kabahayan sa Gen. T. de Leon, Valenzuela City kaninang madaling araw.

Nagsimula ang sunog pasado ala-una ng madaling araw at inakyat na ang first alarm ganap na 1:56 a.m.

Umabot sa 4th alarm ang sunog sa loob lamang ng mahigit isang oras, pero naapula rin ito pagdating ng 3:45 ng madaling araw.

Tinatayang nasa P150,000 ang halaga ng mga nasunog na ari-arian, at sinasabing nagsimula ang sunog sa bahay ng isang “Michael” sa Kalye 11 sa nasabing barangay.

Iniimbestigahan pa ng mga tauhan ng Bureau of Fire Protection ang pinaka-sanhi ng sunog.

Sa kabutihang palad wala namang naitalang nasugatan o nasawi sa insidente.