Para kay Communist Party of the Philippines (CPP) founder Jose Maria Sison, maganda ang takbo ngayon ng usaping pangkapayapaan sa pagitan nila ng gobyerno.
Sa isang INQ&A interview, sinabi ni Sison na nakatapos na ang parehong panig ng limang agenda, kabilang na ang pagpapatibay sa nauna nang pinirmahang mga kasunduan, pagpapabilis sa proseso ng mga negosasyon at ang reconstitution ng Joint Agreement on Security and Immunity Guarantees (JASIG).
Tatlong reciprocal groups na rin aniya ang tumatrabaho sa iba pang mga kasunduan kabilang ang agreement on social and economic reforms, political and constitutional reforms, at pati na ang agreement to end hostilities.
Target na tapusin ang drafts ng mga kasunduan sa loob ng susunod na anim na buwan.
Muli ring pinuri ni Sison si Pangulong Duterte dahil sa pagiging bukas nito sa pagpapabilis ng peace negotiations, at mas nakikitaan niya ngayon ng determinasyon ang pamahalaan para makabuo ng magagandang kasunduan.
Ani pa Sison, isasagawa ang sunod na formal talks para sa draft ng mga comprehensive agreements.
Mas positibo rin aniya ang pananaw nila sa peace talks ngayon dahil kahanay ng paniniwala ng NDFP ang political will ni Pangulong Duterte.