Muling hinimok ng Commission on Elections o Comelec ang Kongreso na ilabas na sa katapusan ng Agosto ang pasya kung ipagpapaliban o hindi ang Barangay at Sangguninang Kabataan o SK polls.
Ayon kay Comelec Chairman Andres Bautista, marapat nang magdesisyon ang Senado at Kamara hinggil sa mga panukalang i-postpone ang halalang pambarangay at SK, dahil depende rito ang paghahanda ng poll body sa nakatakdang botohan.
Ang orihinal na petsa ng Barangay at SK polls ay sa October 31, 2016, subalit patuloy ang paghahain ng mga panukalang huwag munang isagawa ang eleksyon.
Samantala, sinabi ng Comelec na gagamitin ng National Printing Office o NPO ang nalalabing ballot paper na nabili noon para sa May 2016 Presidential elections.
Ang mga natitirang ballot paper ay uubra pang gamitin para naman sa pag-imprenta ng mga balotang laan sa Barangay at SK elections.
Sa ganitong paraan, tinatayang nasa 250 million pesos ang natipid ng Comelec para sa procurement ng mga paper rolls.
Aabot na lamang sa 600 hanggang 800 paper rolls ang kailangan para sa pag-imprenta ng walumpu’t limang milyong balota para sa Barangay at SK elections.
Nakamura rin ang Comelec dahil sa halip na P3.50 kada balota ang singil ng NPO, nagkasundo na raw na P3.00 na lamang ang bawat balota.