Ayon kay Associated Labor Union (ALU) Spokesperson Alan Tanjusay, dapat ay nasa mahigit apat na libo ang dagdag sa minimum na sweldo kada buwan sa National Capital Region (NCR).
Habang ang mga manggagawa sa labas ng Metro Manila ay kailangan ng dagdag na mahigit anim na libong piso.
Batay sa datos ng Food and Nutrition Research Institute (FNRI), National Economic and Development Authority (NEDA) at Philippine Statistics Authority (PSA), sinabi ng grupo ni Tanjusay na nasa P12,517 per month o P417.23 per day ang kailangang national standard amount para maka-survive ang pamilya na may limang miyembro.
Una namang sinabi ng NEDA na base sa kasalukuyang kundisyon sa bansa, ang simple at komportableng buhay ay kailangang mayroong gross monthly income na P120,000 kada pamilya na may apat na miyembro.
Pero puna ng grupo, sa data ng Central Bank, ang P491 daily minimum wage ay katumbas ng buying power na P367.17 kada araw o P9,546.42 per month sa NCR.
Samantalang ang average purchasing power ng daily minimum wage sa labas ng Metro Manila ay P250.67 kada araw o P6,517.42 kada buwan.