Daan-daang buhay ng mga pasahero ang isinagip ng isang Arabong bumbero sa nag-crash na eroplano ng Emirates sa Dubai National Airport kapalit ng sarili niyang buhay.
Ayon sa ulat ng The Mirror, nagawa ng bumberong si Jasim Issa Mohammed Hassan na mailigtas ang buhay ng nasa 300 katao, ngunit siya naman ang nasawi.
Nagtamo ng mga matinding pinsala sa katawan si Hassan matapos tumulong na apulahin ang sunog sa kasagsagan ng rescue operations.
Dahil sa kaniyang tulong, lahat ng nasa eroplano, kabilang na ang 282 na fliers at 12 cabin staff, ang nakalabas nang buhay mula sa nasusunog na eroplano.
Matapos mailabas lahat ng tao, biglang sumabog ang eroplano at doon nasawi si Hassan.
Isang araw matapos ang insidente ay nagbigay-pugay sa kaniyang kabayanihan ang General Civil Aviation Authority.