(UPDATE) Binulabog ng bomb scare ang bahagi ng lugar na pagdarausan Rio Olympics sa Rio de Janeiro sa Brazil.
Isang oras na isinara at kinurdunan ang Athletes’ Village na tinutuluyan ng mga kalahok na atleta para suriin sa bomba.
Isang malaking bag kasi ang iniwan sa madilim na bahagi ng Athletes’ Village partikular sa Welcome Center, dahilan pra magtaas ng bomb alert.
Dahil dito, daan-daang atleta at kanilang coaches kasama na ang mga miyembro ng Philippine team ang hindi agad nakabalik sa compound.
Nagtalaga din ng bomb-sniffing robot ang mga otoridad at pansamantalang pinalikas ang mga nasa center.
Isang oras matapos ang pag-iinspeksyon, idineklarang “clear” sa bomba ang lugar at saka lamang napayagan ang mga atleta at mga coach na makapasok at makakain ng hapunan.