Umaabot na sa 127 ang bilang ng nasasawi sa nagpapatuloy na pinaigting na anti-illegal drug operations ng Philippine National Police.
Samantala, nasa halos 60,000 nang mga hinihinalang adik at nagtutulak ng iligal na droga ang sumusuko na sa mga otoridad sa buong bansa.
Ayon kay Chief Supt. Camilo Cascolan, pinuno ng Directorate for Operations ng PNP, sa mga sumuko, 57,816 dito ay gumagamit habang 2,157 naman ang itinuturing na pusher ng droga.
Sa kabila nito, sinabi ni Cascolan na maliit pa lamang na porsiyento ang mga kasalukuyang bilang dahil sa tala ng PNP, nasa 1.8 milyon ang bilang ng mga gumagamit ng iligal na droga sa bansa.
Dahil sa dami ng mga nagsisukong mga drug users at pusher, pinaplano na ang pagbuo ng mga inter-agency committee na tutugon sa pagsugpo ng iligal na droga at mabigyan ng kaukulang atensyon ang mga nais nang magbago.